நடுநிசிப் பொம்மைகள்

நடு நிசிகளில்
பொம்மைகள் அச்சம் கொண்டெழுகின்றன
அவைகளின் விழிகளுள் படர்கிறது
உதிர்ந்துகிடக்கும் மிரட்டும் விழிகள்

பொம்மைகள் சிரித்துப் பேசும்
மனநிலையில் இருப்பதில்லை
மிரட்டும் விழிகள்
ஆணியடிக்கிறது அதன் அடி மனதில்

எப்போதும் அறையின்
ஏதாவதொரு மூலையில்
மௌனமாய் முகத்தில் சோகம் நிரம்பி
அம்மனமாக சிலவேளை உறங்குகின்றன
அல்லது விழித்திருக்கின்றன.


பொம்மைகள் விழித்திருக்கும் போதும்
அல்லது உறங்கும் போதும்
அதன் விழிகள் கொடூரமான மிருகமொன்றினதோ
அல்லது
கொடூரமான பறவையொன்றினதாகவோ
அல்லது
கொடூரமான மனிதனுடையதாகவோ
தன் அடையாளம் காட்டுகிறது.

அறையின் மத்தியில்
உதிர்ந்துகிடக்கும் விழிகள்
நினைவில் வரும்போதெல்லாம்
பொம்மைகள்
தமது முகங்களை கண்ணாடியில் பார்ப்பதற்கு
அச்சப்படுகின்றன அல்லது வெறுக்கின்றன.

23-05-2006
தானா விஷ்ணு